«Ахмет-ұлт ұстазы» атты әдебиет онкүндігі
Дінмұхамед Ахметұлы Қонаев атындағы Ойық ауылы орта мектебінде 2018 жылы 12-22 қараша аралығында А.Байтұрсынұлының туғанына 145 жыл толуына орай «Ахмет-ұлт ұстазы» атты әдебиет онкүндігі өтті.
Онкүндік барысындағы іс-шаралар ұлт ұстазына айналған ақын, ғалым, қоғам және мемлекет қайраткері Ахмет Байтұрсынұлы өмірі, шығармашылығы, еңбектерінің идеясы туралы оқушылардың терең білуін ұйымдастыру негізінде ақын шығармалары арқылы оқушылардың ел тарихына ортақтасу сезімдеріне ықпал етіп, оларды отансүйгіштікке тәрбиелеу, білім алуға құлшындыру мақсаттарында ұйымдастырылды.
Білім алушылар «Ахмет атаға арнау» айдарымен ақынға арнап өлең, эссе жазды. «Ахмет-ақын, ғалым, тіл білімінің атасы» атты жалпы тақырыппен ақын шығармашылығы бойынша қабырға газеттерін, әдеби журналдар шығарды. Ж.Аяпбергенованың ұйымдастыруымен 5-6-сыныптар аралығында «Мысалмен жеткен ойлар» айдарымен А.Байтұрсынұлы мысалдарын сахналау сайысы өткізілді. Оқушылар ақынның «Қырық мысал» жинағынан алынған мысалдардың идеясын, ақынның айтар ойын рөлдерге ене отырып жеткізді. 7-9-сыныптар аралығында «Маса» жинағы-елшілдік ұраны» атты поэзия кешін пән мұғалімі Г.Сүгіралиева өткізді. Кеште оқушылар ақынның өмірі, шығармашылығы туралы көп мәліметтер ала отырып, «Маса» жинағындағы өлеңдерді мәнерлеп жатқа айтты, ой бөлісу арқылы өлеңдердің идеясын талдады.
Ж.Төлеу 8-11-сынып оқушыларымен «Ойшыл ақын, ғибратты ғұлама» тақырыбында әдеби кеш өткізді. Кеште оқушылар Алаштың ардақтысы А.Байтұрсыновтың өмірі мен шығармаларына қатысты деректер жинап, ортаға салды. Тұңғыш қазақ тілтанушы ғалым ретіндегі, әдебиеттанушы ғалым, түркітанушы, педагог ретіндегі еңбектерін атап, дарынды ақынның болмысын таныды. Оқушылар ақын өлеңдерін жатқа айтып, мақалаларынан үзінділер оқыды, А.Байтұрсынұлы туралы арнау өлеңдер, пікірлер мен естеліктер айтты. Соңында пікір алмасу арқылы ақынның «Ұлт ұстазы», «Адамдық диқаншысы» атану себебін ұғынды.
Онкүндік қорытындысы бойынша белсене қатысқан оқушылар, сыныптар мақтау қағаздарымен марапатталды.
